Kulinarna Mapa Regionu

Na tusty szczwortek swojski kreple z Raja.

Takich krepli nikaj nie poradzicie kupić. A już te diosectwo ze marketōw to mo rychtyk na noc.

Pomyślcie sie tak rychtyk. Eli we markecie (abo dyskōncie – jedyn pierōn) krepel je po 1,50 zł, to co to może być? Myślicie, że jakoś gospodyni sie nad nim roztkliwiała? Kaj! Psińco! Ciepli kupno mieszōnka do masziny, dodali wody a jajec w proszku i fertig. Z drugij strōny wylazły kreple z filōngiym a kōnserwantami. Jakby tak kiery praje poczytoł skład, to mōnej by sie nogom przeżegnoł. Mōnki a jajec to hań bydzie nōmynij. Jak chcecie sie dzisio pojeść rychtyk dobrych krepli, to jo Wōm dōm przepis. A tak dokładnie, to Wōm go do moja Potka Anka ze Raja. Idzie pedzieć, iże to sōm rychtyk rajski kreple. Rychtujcie sie. Bydymy ich robić.

Kulani rajskich krepli. Kulo Maria, wnuczka Potki Anki.

Narychtujcie:
Kilo mōnki, 8 deko drożdzy, pōł litra mlyka, 1 jajco, 4 zōłtka, 15 deko tustego (przikładowo masło a ōmasta), 1 płasko (ale fest płasko) łyżeczka soli, 20 deko cukru (eli lubicie fest słodki abo chcecie przibrać to dejcie 25 deko), pōł szklōnki kwaśnyj śmiytany a kieliszek szpirytusu. Ku tymu kole 2 litry  ôleju i kilo fetu na smażyni (może być trocha mynij).

I terozki:
Poła cukru i drożdże dejcie do letnigo mlyka i rozfyrlejcie. Nikierzy dowajōm mōnka, ale jo ni. Doczkejcie aż zageruje i wlyjcie to do przesiotyj mōnki ze solōm. Ku tymu ubite jajca i żōłtka, reszta cukru i rozpuszczōny fet. Dodejcie masło i śmiytana. I wlyjcie szpirytus, ale fest pomału, coby nie sparzić ciasta (alkohol zabijo drożdże!). No i fest, fest wyrobiać. Fest. Aż sie człowiek spoci. Ôstawić aż wyrośnie. Potyn rozciōngnyć na stōł, rozwałkować nudelkulōm, wykrować szklōnkōm kōłka i formować kreple, a do środka dodać swojskij marmelady. Musi być swojsko, bo mo być twardo, inakszy wōm wyleci i bydzie wszysko psowi na buda. Zaś doczkać aż kreple wyrosnōm i smażić we tym fecie ze ôlejym.

Autorka przepisu (po lewej) na ekranie TVP Katowice

Jo przeważnie biera 2 kilo mōnki, mōj Alojz mi to wyrobio, to jak o 4:00 rano sztartnymy, to na 8:00 my sōm fertig i mogymy jeść. Niech sie Wōm tyż darzi.

Anna Adamczyk ze Raja

Powiązane artykuły

Dodaj komentarz

Twój adres e-mail nie zostanie opublikowany.

Back to top button